İlk dəfə səs verəcək gənclərlə maarifləndirici tədbir keçirilmişdir

         260 № li tam orta məktəbdə Azərbaycan Respublikası Prezidentinin 2017-ci il 15 sentyabr tarixli Sərəncamı ilə təsdiq edilmiş “Azərbaycan gəncliyi 2017-2021-ci illərdə” Dövlət Proqramının 5.7.3-cü (Gənclər arasında seçki prosesinin və seçkilərdə (referendumda) iştirakın təbliği, ilk dəfə səs verən gənc seçicilər arasında maarifləndirmə işinin təşkili) maddəsinin icrasına uyğun olaraq bələdiyyə seçkilərində ilk dəfə səs verəcək gənclərlə maarifləndirici tədbir keçirilmişdir.
       Tədbirdə Bakı şəhər Gənclər və İdman Baş İdarəsinin rəis müavini Aydın Yusifov, 34 saylı Xətai 2-ci Dairə Seçki Komissiyasının sədri Rafael Mehdiyev, 260 № li tam orta məktəbin direktoru Kəmalə Quliyeva, Xətai rayon Gənclər və İdman İdarəsinin baş məsləhətçisi Elvin Orucov, rayon Gənclər və İdman İdarəsinin aparıcı məsləhətçisi (gənclər sahəsi üzrə) Məmməd Rzayev və ilk dəfə səs verəcək rayon gəncləri iştirak etmişlər.
          Tədbir rəsmi və nəzəri-praktiki hissə olmaqla 2 hissədə təşkil olunmuşdur. Xətai rayon Gənclər və İdman İdarəsinin baş məsləhətçisi Elvin Orucov tədbiri giriş sözü ilə açaraq, qonaqları və ilk dəfə səs verən gəncləri salamladı. Sonra çıxış edən Bakı şəhər Gənclər və İdman Baş İdarəsinin rəis müavini Aydın Yusifov ölkəmizdə gənclər üçün yaradılan yüksək şəraitdən, onlara göstərilən diqqət və qayğıdan danışdı. O, gənclərə Azərbaycan Respublikasının Konstitusiyası ilə müəyyən edilmiş seçki hüququndan istifadə etməyi və seçkilərdə fəallıq nümayiş etdirməyi tövsiyə etdi.
         Tədbirin nəzəri hissəsində 34 saylı Xətai 2-ci Dairə Seçki Komissiyasının sədri Rafael Mehdiyev Xətai rayonunda seçki ərəfəsində görülən işlər, səsvermə prosesi, onun hüquqi əsasları və tənzimlənməsi məsələlərini gənclərə izah etdi, mövzu ətrafında gənclərin suallarını cavablandırdı.
           Sonda praktiki hissədə qurulmuş praktik məntəqə şəraitindən istifadə edərək səsvermə prosesi əvvəldən sonadək gənclərə izah olundu.