Yasamal rayonunda Azərbaycan Gəncləri Günü qeyd olunub
Yasamal rayon Heydər Əliyev Mərkəzində 2 fevral-Azərbaycan Gəncləri günü münasibəti ilə rayon gənclərinin yekun toplantısı keçirilmişdir.
Toplantıda Yasamal Rayon İcra Hakimiyyəti başçısının birinci müavini Səməd İslamov, Bakı şəhər Gənclər və İdman Baş İdarəsinin rəisi Raqif Abbasov, millət vəkili Elşad Həsənov, Yeni Azərbaycan Partiyası Gənclər Birliyinin sədri Seymur Orucov, Yasamal rayon Gənclər və İdman İdarəsinin rəisi İlham Səfərov, o cümlədən rayon ərazisində fəaliyyət göstərən Azərbaycan Milli Elmlər Akademiyasının bir qrup gənc alimi, ali və orta ixtisas məktəblərinin bir qrup tələbələri, idarə, müəssisə və təşkilatlarda çalışan fəal gənclər, siyasi partiyaların, ictimai təşkilatların, Qeyri Hökumət Təşkilatlarının nümayəndələri iştirak etmişlər.
Tədbirdən öncə tədbir iştirakçıları tərəfindən Azərbaycan Dövlət Mədəniyyət və İncəsənət Universitetinin tələbəsi Məmmədli Taleh Hidayət oğlunun rəsm işlərindən ibarət sərgiyə baxış keçirilmiş, daha sonra Heydər Əliyev Mərkəzinin muzey bölməsində yerləşən Azərbaycan xalqının Ümummilli Lideri Heydər Əliyevin abidəsi önünə gül dəstələri qoyulmuşdur.
Toplantını açıq elan edən Yasamal rayon Gənclər və İdman İdarəsinin rəisi İlham Səfərov tədbir iştirakçılarını Azərbaycan gəncləri günü münasibəti ilə təbrik etmiş və bildirmişdir ki, Azərbaycan Gənclər günü məhz Ümummilli Lider Heydər Əliyevin şəxsi təşəbbüsü ilə təsis edilmişdir. İlham Səfərov qeyd etdi ki, müvafiq fərmanın imzalanmasından 20 ildən artıq bir zaman ötür. Bu illər ərzində respublika gəncləri kifayət qədər formalaşmış və cəmiyyətin aparıcı qüvvələrindən birinə çevrilmişdir. Daha sonra İlham Səfərov «Heydər Əliyev və dövlət gənclər siyasəti» mövzusunda məruzə ilə çıxış etmişdir.
Sonra Bakı şəhər Gənclər və İdman Baş İdarəsinin rəisi Raqif Abbasov çıxış edərək bildirib ki, Ulu Öndər Heydər Əliyev fəaliyyətinin bütün dövrlərində gənclərə yüksək diqqət və qayğı göstərib. Azərbaycan Prezidenti İlham Əliyevin bu diqqət və qayğını uğurla davam etdirməsi nəticəsində gənclərimiz dünyanın ən nüfuzlu universitetlərində təhsil alır, yüksək ixtisaslı mütəxəssislər kimi yetişərək ölkəmizin inkişafında mühüm rol oynayırlar. Gənclərimizin savadlı, bilikli olmalarının, onların informasiya-kommunikasiya texnologiyalarını, habelə xarici dilləri mükəmməl bilmələrinin zəruriliyini vurğulayan Raqif Abbasov bunun üçün Azərbaycan dövləti tərəfindən hər cür şəraitin yaradıldığını qeyd edib.
Toplantıda Yeni Azərbaycan Partiyası Gənclər Birliyinin sədri Seymur Orucov «Gənclərin ictimai-siyasi həyatda rolu» mövzusunda, Azərbaycan Milli Elmlər Akademiyasının Gənc Alim və Mütəxəssislər Şurasının sədri Famin Salmanov «Azərbaycanın elmi gəncliyinə diqqət və qayğı dövlət siyasətinin əsası kimi» mövzusunda, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin 3 saylı Bakı “ASAN xidmət” mərkəzinin əməkdaşı Tural Nağıyev «ASAN xidmət mərkəzi kreativ gənclərin könüllü fəaliyyətinin əsası kimi» mövzusunda, Azərbaycan Respublikasının Prezidenti yanında Gənclər Fondunun əməkdaşı Ülvi Adıgözəlov «Gənclər Fondunun dövlət gənclər siyasətində rolu» mövzusunda, Bakı Dövlət Universitetinin biologiya fakültəsinin “SABAH” qrupunun II kurs tələbəsi Vəfa Mürsəlzadə «Müasir gənclik və vətənpərvərlik tərbiyəsi» mövzusunda çıxışlar etmişlər.
Sonda AMEA-nın Radiasiya Problemləri İnstitutunun aparıcı elmi işçisi Əliyeva Nuranə Əlislam qızı və Azərbaycan Memarlıq və İnşaat Universitetinin Tələbə Həmkarlar İttifaqı Komitəsinin sədri Aslanov Bayram Mirazim oğlu rayonun ictimai-siyasi həyatında fəal iştirak etdiyinə görə və 2 fevral-Azərbaycan Gəncləri günü münasibəti ilə Yasamal rayon İcra Hakimiyyətinin fəxri fərman və xatirə hədiyyələri ilə təltif edilmişdir. Bundan əlavə, tədbirdə müxtəlif nominasiyalar üzrə, dövlət gənclər siyasətinin həyata keçirilməsində göstərdiyi səmərəli fəaliyyətinə görə, yeniyetmə və gənclərin vətəndaşlıq və vətənpərvərlik tərbiyəsinin gücləndirilməsində göstərdiyi səmərəli fəaliyyətinə görə, yeniyetmə və gənclərin asudə vaxtının səmərəli təşkilində göstərdiyi səmərəli fəaliyyətinə görə bir qrup fəal gəncə Yasamal rayon Gənclər və İdman İdarəsinin təsis etdiyi fəxri fərman və xatirə hədiyyələri təqdim olunmuşdur.