Baş İdarə gənclərin Qubadakı kütləvi məzarlığa ziyarətini təşkil edib

           Bu gün Bakı şəhər Gənclər və İdman Baş İdarəsi (BŞGİBİ)  31 Mart-Azərbaycanlıların Soyqırımı Günü ilə əlaqədar Bakı şəhərində yerləşən ali  təhsil müəssisələrinin fəal tələbə gənclərinin Quba rayonunda tapılan kütləvi məzarlığa və Quba Soyqırımı Memorial Kompleksinə səfərini təşkil edib.  Səfər zamanı gənclər Quba Soyqırımı Memorial Kompleksini ziyarət edib və kütləvi məzarlıq üzərinə çiçəklər düzüblər. Gənclərə 1918-ci ildə ermənilər tərəfindən azərbaycanlılara qarşı törədilən soyqrımı haqqında ətraflı məlumat verilib, sənədlər və faktlarla tanışlıq imkanı yaradılıb.

           Arxeoloqların məlumatına görə, məzarlığa gömülənlər 1918-ci il mayın 1-dən 10-na qədər törədilən erməni qətilamının qurbanlarıdırlar. Böyük ehtimalla, ermənilər 1918-ci ildə Qubada qətlə yetirdikləri dinc azərbaycanlıların az bir qismini burada quyulayıblar. Deməli, yaxınlarda başqa məzarlıqların da tapılacağı istisna deyil. Aşkarlanan iki quyudan birinin diametri 5, digərininki 2,5 metrdir. Onlar arasında 2 metr məsafə var. Çox güman ki, birinci quyu insan sümükləri ilə dolduğuna görə, yanında ikinci kiçik quyu qazılıb. Böyük quyuda yüzlərlə insan skeletləri var. Kiçik quyunun ağzı isə hələ açılmayıb. Skeletlərin bütöv halda tapılmaması insanların öldürüldükdən sonra, sanki şaqqalanaraq bura atıldığını göstərir. Çoxlu insan kəlləsi, uşaq sümükləri arasından yalnız 35 skeleti bütöv halda götürmək mümkün olub. Ümumilikdə isə, tədqiqat zolağında 2 arxda qazıntılar aparılıb və 196-dan artıq insanın sümükləri aşkarlanıb. Onların 50-si qadınlara, qalanları isə yaşlı və körpələrə aiddir. Bəzi kəllə sümüklərinin üzərində paslı mismarlar var, bunlar insanların ermənilər tərəfindən işğəncələrlə qətlə yetirilməsinin sübut edən dəlillərdir.

                Quba məzarlığında aşkar edilən insan cəsədlərinin qalıqlarını həyəcansız nəzərdən keçirə bilməyən gənclər bəyan ediblər ki, bütün dünyaya özlərini məzlum, əzilmiş xalq kimi göstərən ermənilərin bu vəhşiliyi sübüt edən video görüntüləri xarici mətbuatlarda və telekanallarda geniş şəkildə nümayiş etdirilməlidir və gənclərimiz bu həqiqəti dünya ictimaiyyətinə çatdırmaq üçün əllərindən gələni etməlidirlər.

               Artıq 12-ci ildir ki, Bakı şəhər Gənclər və İdman Baş İdarəsi tərəfindən Quba rayonunda tapılmış kütləvi məzarlığa Bakı şəhər tələbələrinin səfəri təşkil olunur.  Səfərimizin məqsədi Bakı şəhərində yerləşən ali və orta ixtisas müəssisələrinin tələbələrinə ermənilərin xalqımıza qarşı törətdiyi vəhşiliklərinin əyani sübutunu göstərməkdən ibarətdir.