TİBB UNİVERSİTETİNDƏ GƏNCLƏR GÜNÜ QEYD OLUNUB

       Bu gün ölkəmizdə gənclərin hərtərəfli inkişafına şərait yaradan və onların potensialını üzə çıxaran dövlət siyasəti həyata keçirilir

        2 fevral – Azərbaycan Gəncləri Günüdür. Bu münasibətlə Azərbaycan Tibb Universitetində tədbir keçirilib. “Azərbaycan Gəncləri Günü-25” adlı toplantının açılışında torpaqlarımızın azadlığı uğrunda canlarından keçən şəhidlərimizin əziz xatirəsi yad edilib, Azərbaycan Respublikasının Dövlət Himni səsləndirilib.

       Sonra Nəsimi rayon Gənclər və İdman İdarəsinin rəisi Şahmar Tağıyev iştirakçıları salamlayıb və toplantını açıq elan edib.

       Bakı şəhər Gənclər və İdman Baş İdarəsinin rəisi Raqif Abbasov çıxışında bildirib ki, əsası ümummilli lider Heydər Əliyev tərəfindən qoyulmuş dövlət gənclər siyasəti Azərbaycan gəncliyinin inkişafında dərin izlər buraxıb. Onun sözlərinə görə, Gənclər Günü MDB məkanında və Şərqi Avropa ölkələri arasında ilk dəfə Azərbaycanda qeyd olunub: “1996-ci ilin 2 fevralında Azərbaycan Respublikası gənclərinin I forumu keçirilib. 1997-ci ildən isə ölkəmizdə ulu öndər Heydər Əliyevin sərəncamı ilə Gənclər Günü qeyd olunur: “Ümummilli lider Heydər Əliyev gənclər sahəsində dövlət siyasətinin uğurla həyata keçirilməsi məqsədilə bütün dünyaya nümunə olacaq daha bir addım atıb – bu sahənin zəruri qanunvericilik bazasının formalaşdırılmasını təmin edib. Ulu öndərin gəncliyə və gənclərə etimadı bu gün artıq öz təsdiqini tapır. İndi ölkəmizdə gənclər siyasəti mahiyyət və keyfiyyətcə yeni mərhələsini yaşayır. Prezident İlham Əliyev ümummilli liderin gənclər siyasətinə sadiqliyini öz qərarları ilə təsdiq edir. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait bu sahəyə böyük diqqətin nəticəsidir”.

        Sözünə davam edən idarə rəisi deyib ki, dövlət başçımızın imzaladığı “2007-2015-ci illərdə Azərbaycan gənclərinin xarici ölkələrdə təhsil üzrə Dövlət Proqramı” bütün təbəqələrdən olan gənclərin xaricdə təhsilinə geniş imkanlar yaradıb. Bu proqram çərçivəsində minlərlə gənc dünyanın ən nüfuzlu təhsil ocaqlarında oxuyub. Bundan başqa, gənclərin intellektual, fiziki və mənəvi inkişafını, ölkənin sosial-iqtisadi, ictimai-siyasi və mədəni həyatında fəal iştirakını təmin etmək məqsədilə “2015-2025-ci illərdə Azərbaycan gənclərinin İnkişaf Strategiyası”nı təsdiq edib. Gənclərlə bağlı bütün məsələlərin geniş əhatə olunduğu bu mühüm sənədin məqsədi ölkədə gənclər siyasətinin daha səmərəli həyata keçirilməsinə nail olmaq, cəmiyyətin bütün sahələrində gənclərin fəal iştirakına şərait yaratmaq, onların yaradıcı və innovativ potensialının üzə çıxarılmasını dəstəkləmək, gənc nəslin sağlamlığını qorumaq, gənclərin təhsil və məşğulluq məsələlərinə diqqəti artırmaq, müasir informasiya-kommunikasiya texnologiyalarından səmərəli istifadə etmək, ölkədə könüllülük hərəkatını inkişaf etdirməkdir”.

         Gənclər siyasətində idmanın inkişaf etdirilməsinə də xüsusi diqqət yetirildiyini deyən R.Abbasov vurğulayıb ki, Prezident İlham Əliyevin iradəsi və böyük səyləri nəticəsində Azərbaycan dünyanın qabaqcıl idman ölkələrindən birinə çevrilib. Bu gün ölkəmizin nüfuzlu beynəlxalq idman yarışlarına ev sahibliyi etməsi, idmançılarımızın Olimpiya və dünya çempionatlarında uğurlu çıxışları buna əyani sübutdur.

       ATU-nun Tərbiyə işləri üzrə prorektoru, dosent Zülfüqar Musabəyov çıxışına gənclərimizi bu gün münasibətilə təbrik etməklə başlayıb. Prorektor xatırladıb ki, 2 fevral tarixinin Gənclər Günü kimi elan olunması ulu öndər Heydər Əliyevin adı ilə bağlıdır: “Ümummilli liderin ikinci dəfə siyasi hakimiyyətə qayıdışından sonra bütün sahələrdə olduğu kimi, gənclər siyasətində də müsbət tendensiyalar müşahidə olunmağa başladı. 1994-cü ildə dövlət gənclər siyasətini icra edən Gənclər və İdman Nazirliyi yaradıldı. 1996-cı ildə gənclərin I forumu keçirildi. Bir il sonra Azərbaycan Gəncləri Günü elan edildi. Gənclərin inkişafı üçün atılan addımlar sayəsində tezliklə Azərbaycanda güclü vətənpərvər gənclər ordusu formalaşdı. Vətən müharibəsində Azərbaycanın qələbəsini təmin edənlər də məhz bu gənclərimiz oldu. Bu günkü tədbirimizdə də müharibə iştirakçıları, qazilərimiz iştirak edir. Onları da salamlayır və təbrik edirəm. Müharibədə həm döyüşüb, həm də insan həyatını xilas edən hərbi həkimlər arasında ATU-nun məzunları əksəriyyət təşkil edir. Xatırlatmaq yerinə düşər ki, 2000-ci ildə ATU-da hərbi fakültənin açılması da məhz ulu öndərin təşəbbüsü ilə baş tutub”.

         Z.Musabəyov qeyd edib ki, gənclər üçün əsas istiqamət təhsildir: “Biz Azərbaycan Tibb Universiteti olaraq siz gənclərə yalnız elmin sirlərini öyrətməklə kifayətlənmir, həm də vətənpərvər, fəal vətəndaşlar olmağınız üçün çalışırıq. Azərbayan Tibb Universitetinin rektoru, professor Gəray Gəraybəyli də daim bu məsələyə diqqət yetirir, təşəbbüskar gənclərə dəstək olur. ATU rəhbərliyi tərəfindən gənclərimizin, tələbələrimizin inkişafını stimullaşdırmaq üçün müxtəlif layihələr reallaşdırılır. Biz yeni düşüncəli, kreativ ruhlu gəncliyin yetişdirilməsi, səhiyyəmizi yüksək ixtisaslı kadrlarla təmin etmək yönündə çalışırıq.

       Bu gün dünya, texnologiyalar o qədər sürətlə inkişaf edir ki, həyatda öz layiqli yerini tapmaq üçün yüksək savad və bacarıq tələb olunur. Ona görə də hər bir sahədə – istər səhiyyə, istər təhsil, istərsə də elm və ya iqtsadiyyat olsun – işləyən gənclər çalışmalıdırlar ki, öz peşəkarlıqlarını artırsınlar”.

      Prorektor Azərbaycan gənclərinin II forumunda ümummilli lider Heydər Əliyevin gənclərə müraciətini yada salıb: “Ulu öndər deyib: “Biz müstəqil Azərbaycanın taleyini gələcəkdə sizə tapşıracağıq. Ona görə də Azərbaycanı, Azərbaycan dövlətini yaşatmaq, inkişaf etdirmək üçün hazır olun!”

        Ulu öndər tərəfindən müəyyənləşdirilmiş siyasi kurs bu gün ölkə prezidenti İlham Əliyev tərəfindən uğurla davam etdirilir. Prezidentin rəhbərliyi ilə həyata keçirilən dövlət gənclər siyasəti Azərbaycan gəncliyinin inkişafına təkan verib, onların özlərini cəmiyyətdə təsdiq etməsində mühüm rol oynayıb. Bu siyasət nəticəsində gənclərimiz dövlətçiliyə bağlı, intellektual, yüksək dünyagörüşlü bir qüvvə kimi formalaşıb.

        Azərbaycan dövlətinin gənclər siyasətindən danışarkən prezident İlham Əliyev tərəfindən imzalanmış “Azərbaycan gəncliyi 2005-2009-cu illərdə” və “Azərbaycan gəncliyi 2011-2015-ci illərdə” Dövlət proqramları xüsusi qeyd edilməlidir. Dövlət başçısı qloballaşma əsrində dünya elminə, təhsilinə inteqrasiyanı vacib sayaraq, azərbaycanlı gənclərin xaricdə təhsil almasına ciddi əhəmiyyət verir.

       Hazırda 2015-2025-ci illəri əhatə edən Azərbaycan gənclərinin İnkişaf Strategiyası uğurla icra olunmaqdadır. Prezidentin gənclərə dəstək yönündə verdiyi mühüm və əlamətdar qərarlardan biri də ölkədə ilk dəfə “Gənclər üçün Prezident Mükafatı”nın təsis edilməsi oldu”.

        Z.Musabəyovun sözlərinə görə, bu gün Azərbaycanda uğurlu dövlət gənclər siyasəti həyata keçirilir. Bizim gənclik azad düşünür, demokratik cəmiyyətdə yaşayır, məhdudiyyətsiz olaraq fəaliyyət göstərir: “Bu gün dövlətimiz, prezident, Ali Baş Komandan hər bir vətəndaşının, o cümlədən hər bir gəncin yanındadır. Ölkə rəhbərliyinin həyata keçirdiyi məqsədyönlü və ardıcıl siyasət nəticəsində gənclər bu gün Azərbaycanın inkişafı yolunda əzmlə addımlayırlar”.

         Daha sonra çıxış edən Nəsimi rayon İcra Hakimiyyəti başçısının I müavini Gülarə Verdiyeva, ATU-nun Tələbə Həmkarlar Komitəsinin sədri Qoşqar İsmayılov, Tələbə Gənclər Təşkilatının sədr müavini Gülnaz Hüseynova və Vətən müharibəsi qazisi Kənan Kərimli dövlətimizin gənclərlə bağlı zamanın tələblərinə uyğun siyasət yürütdüyünü söyləyiblər. Natiqlər gənclər siyasətinin səmərəli həyata keçirildiyini, cəmiyyətin bütün sahələrində gənclərin fəal iştirakına şərait yaradıldığını, onların təhsil, sağlamlıq və məşğulluq məsələlərinə diqqətin artırıldığını vurğulayıblar. Qeyd edilib ki, gənclərimiz üçün ən həlledici sınaqlardan biri 44 günlük Vətən müharibəsi olub. Rəşadətli Ordumuzun sıralarında Vətən uğrunda mətanətlə vuruşan qəhrəman gənclərimiz adlarını xalqımızın ən yeni tarixinə qızıl hərflərlə yazdırmağı bacarıblar. Məhz onların qəhrəmanlığı ilə əldə olunan bu şanlı Zəfər sayəsində ərazi bütövlüyümüz bərpa olundu, xalqımız otuz illik həsrətdən sonra əzəli torpaqlarına qovuşdu. Gənclərimizin müharibə zamanı arxa cəbhədə də yüksək fəallıq göstərdiyi, ölkəmizlə bağlı həqiqətlərin beynəlxalq ictimaiyyətin diqqətinə çatdırılmasında xüsusi aktivliyi də vurğulanıb. Bildirilib ki, bundan sonra Azərbaycan gəncliyinin azad edilən torpaqlarımızda görüləcək quruculuq-abadlıq işlərində fəal iştirak etməsi mühüm əhəmiyyət kəsb edir.

            Tədbirin sonunda gəncləri düşündürən suallar cavablandırılıb, səslənən təklif və rəylərə aydınlıq gətirilib. Eləcə də rayonun ictimai-mədəni həyatında yaxından iştirak edən bir qrup gənc fəala, o cümlədən Vətən müharibəsi qazilərinə “Fəxri fərman”lar təqdim olunub.

https://amu.edu.az/news/2849/tibb-universitetinde-gencler-gunu-qeyd-olunub?fbclid=IwAR0TnULSsF20l6m5ML2HgqfEU5zW1FClfl5szOWeEV0CKvkjP0Dh22BUdiM

adana eskort - eskort adana - bodrum eskort - eskort - escortadana eskort - eskort adana - bodrum eskort - eskort - escort