“Xəmsə” intellektual oyunun Bakı şəhəri üzrə zona mərhələsi

  Bu gün Bakı şəhər Gənclər və İdman Baş İdarəsi tərəfindən Gəncliyə Yardım Fondunda gənclər arasında “Xəmsə” intellektual oyunu üzrə VII Azərbaycan çempionatının Bakı şəhəri üzrə zona mərhələsi keçirilmişdir. “Xəmsə” intellektual oyununda paytaxtın 11 rayonundan  13 komanda iştirak etmişdir. Yarışma komandalar arasında sağlam rəqabət şəraitində keçmiş, verilən suallar tarix, coğrafiya, kimya, fizika, məntiq, dünya görüşünü əhatə etmişdir.  Onu da qeyd edək ki,  suallar və cavablar redaktor qrupu tərəfindən hazırlanır. Cavabın doğruluğunu  aparıcı təsdiq edir. Sualı cavablandırmaq üçün aparıcı 5 saniyə vaxt verir. Vaxtın tamamında cavab vermek istəyən yoxdursa, aparıcı cavabı elan edir və növbəti suala keçir.

  Nəticələrə görə I yeri “BDU” komandası Yasamal rayonu, II yeri “Müşfiq” komandası Qaradağ rayonu, III yeri “ADNA Legends″ komandası Nəsimi rayonu, IV yeri isə “Fərq” Sabunçu rayonu tutmuşdur. Qalib komandalar Baş İdarə tərəfindən  kubok, müvafiq dərəcəli diplomlar və hədiyyələrlə mükafatlandırılmışlar.

   Qeyd edək ki, “Xəmsə” intellektual oyunun final mərhələsi  Quba şəhərində  keçiriləcəkdir. Respublika final mərhələsində Bakı şəhərindən 4 komanda iştirak edəcəkdir.