Nərimanov rayonunda qazilərlə görüşlər keçirilib

            Nərimanov Rayon İcra Hakimiyyətinin, Bakı Şəhər Gənclər və İdman Baş İdarəsinin, Rayon Gənclər və İdman İdarəsinin və Azərbaycan Əlil Arabasında Qılıncoynatma Federasiyasının birgə təşkilatçılığı ilə Nərimanov rayonunda bir qrup Vətən Müharibəsinin qaziləri ilə görüşlər keçirilib.

Görüşlərdə Bakı Şəhər Gənclər və İdman Baş İdarəsinin rəis müavini Aydın Yusifov, Nərimanov Rayon Gənclər və İdman İdarəsinin rəisi Nəcəf Novruzov, Nərimanov Rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri Elçin Quliyev, Azərbaycan Əlil Arabasında Qılıncoynatma Federasiyasının prezidenti Asəf Məlikov, Azərbaycan Kooperasiya Universitetinin Mətbuat və İctimai İşlər Xidmətinin rəhbəri Tamerlan Əkbərov və rayon könüllüləri iştirak etmişlər.

         Görüşlər Vətən Müharibəsi qaziləri Hacıyev Arif Şirvan oğlunun və Mövsumov Ələmdar Səməndar oğlunun yaşadığı evlərdə, Vətən Müharibəsinin qaziləri Abdullayev Rauf Nazim oğlu və Əlişli Cəlal Rafiq oğlu ilə isə Nərimanov rayonunda yeni salınmış ABAD məhəllədə keçirilmişdir.

Görüşlər zamanı onlara mənəvi dəstək, hüquqi məsləhət, gənclərin paralimpiya hərəkatına cəlb olunmaları, qaziləri maraqlandıran sualların müvafiq qurumlara çatdırılma işində dəstəyin göstərilməsi kimi məsələlər müzakirə edilib. Həmçinin qazilərin Azərbaycanda keçirilməsi planlaşdırılan qılıncoynatma üzrə “Zəfər Kuboku”na cəlb edilmələri nəzərdə tutulub.

        Diqqətə çatdırılıb ki, dövlətimiz şəhid ailələrinə, əlillərə, müharibə veteranlarına xüsusi diqqət və qayğı göstərir və vətəndaşlarımızın sosial müdafiəsi daim gücləndirilir.

             Qazilərimiz Arif Hacıyev, Ələmdar Mövsümov, Cəlal Əlişli, Rauf Abdullayev göstərilən diqqətə görə dövlətə və xalqa minnətdarlıq edərək, hər an Vətənin ərazi bütövlüyü, suverenliyi uğrunda döyüşməyə hazır olduqlarını, xalqın diqqətini və sayğısını həmişə hiss etdiklərini və bundan şərəf duyduqlarını söyləyiblər.