Gənclərlə görüş keçirilib
YAP Yasamal rayon, Bakı şəhər Gənclər və İdman Baş İdarəsi və Yasamal rayon Ağsaqqallar Şurasının təşkilatçılığı ilə YAP Yasamal rayon təşkilatında gənclərlə görüş keçirilib.
İlk öncə Azərbaycan Respublikasının müstəqilliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.
YAP Yasamal rayon təşkilatının sədri Bəxtiyar Nəbiyev iştirakçıları salamlayıb və qeyd edib ki, bu gün ölkəmizdə gənc nəslin vətənpərvərlik ruhunda tərbiyə olunması aktual məsələ kimi böyük əhəmiyyət kəsb edir.
Çünki, vətənpərvərlik hissinin aşılanması dövlətin, dilin, adət-ənənələrin, ümumilikdə bütöv bir xalqın gələcəyini təmin edən amillərin ən mühümüdür.
Bəxtiyar Nəbiyev ölkəmizdə gənclərin bu istiqamətdə tərbiyə olunmasına hələ ulu öndər Heydər Əliyevin respublika rəhbərliyinə gəldiyi ilk dövrlərdən başlanıldığını bildirib.
Çıxış edən Yasamal rayon Ağsaqqallar Şurasının sədri Cavanşir Qurbanov söyləyib ki, Ulu Öndər gənclərin himayədarları kimi çıxış edərək sağlam düşüncəli yeni nəslin yetişdirilməsi sahəsində misilsiz işlər görüb.
Gənclərin milli və vətənpərvər ruhda tərbiyəsinə həmişə önəm verən ulu öndər Heydər Əliyev nitqlərinin birində bu barədə belə demişdir: “Gənclərimiz milli ruhda tərbiyə olunmalıdır, milli-mənəvi dəyərlərimizin əsasında tərbiyələnməlidir. Gənclərimiz bizim tariximizə yaxşı bələd olmalı, dilimizi yaxşı bilməlidir. Hər bir gənc vətənpərvər olmalıdır, vətənpərvərlik böyük məfhumdur. Bu, sadəcə orduda xidmət etmək deyil, vətənə sadiq olmaq vətəni sevmək, torpağa bağlı olmaq-budur vətənpərvərlik.”
Cavanşir Qurbanov üzünü gənclərə tutaraq bildirib ki, gənclik hər zaman inkişaf etməli və dövlətinə, xalqına bağlı olamlıdır.
Bakı şəhər Gənclər və İdman Baş İdarəsinin rəisi Raqif Abbasov çıxışında bildirib ki, Gənclərin vətənpərvərlik tərbiyəsi dedikdə, yüksək əxlaqi, mənəvi keyfiyyətlərə yiyələnmə və şəxsiyyət kimi yetişmə nəzərdə tutulur.
Onlar davranış qaydalarını, nizam-intizamı, savadlı olmağa, vətəninin tarixini, coğrafiyasını, mədəniyyətini, milli adət-ənənələrini bilməli, vətəni sevməlidirlər.
Gənclər ideyaca savadlı olmalı, işə şüurlu yanaşmalı, məsuliyyətli, vicdanlı, mübariz olmalı, vətənin inkişafı naminə çalışmalıdırlar. Raqif Abbasov gənclərə hər zaman dövlətimizin bayrağını daim yüksəklərdə tutmaq üçün elm, idman və b. sahələrdə hər zaman öz üzərində çalışaraq inkişaf etmələrini məsləhət görüb.
Daha sonra gənclərlə müzakirə formatında keçən görüşdə gənclər öz ürək sözlərini bölüşüb və suallarına cavab alıblar.
Sonda gənclərlə birlikdə xatirə şəkli çəkilib.