Respublika Velotrekinə gənclər üçün növbəti infotur keçirilib

Sentyabrın 2-də Azərbaycan Respublikası Gənclər və İdman Nazirliyi və Azərbaycan Velosiped Federasiyasının (AVF) təşkilatçılığı ilə Respublika Velotrekinə gənclər üçün növbəti infotur keçirilib. Bakı Şəhər Gənclər və İdman Baş İdarəsinin dəstəyi ilə infoturda Nəsimi, Binəqədi və Yasamal rayonlarının gəncləri iştirak ediblər.
30-dək gəncin qatıldığı tur zamanı Respublika Velotrekinin direktoru Tamerlan Salahov və AVF-nin üzvü Səhər Mehman velosiped idman növü, təhlükəsizlik qaydaları, həmçinin Azərbaycan Velosiped Federasiyasının fəaliyyəti haqda məlumatlar veriblər.
Gənclər yarış treki, BMX meydançası, velosiped boksları, fitnes zalı və velosipedə aid muzeydə olublar. Onlar peşəkar idmançıların məşqlərini izləyib, mütəxəssislərin nəzarətində velosiped sürüblər.
Sonda xatirə şəkli çəkdirilib.
Qeyd edək ki, Respublika Velotrekinə müxtəlif gənclər təşkilatlarının üzvləri üçün davamlı olaraq infoturlar təşkil olunur.