“Arzu ömrü uzatmır” adlı kitabın təqdimatı keçirilib

Bakı Şəhər Gənclər və İdman Baş İdarəsinin təşəbbüsü ilə Daxili İşlər Nazirliyinin (DİN) mətbuat xidmətinin rəis müavini, polis polkovnik-leytenantı Hafiz Təmirovun “Arzu ömrü uzatmır” adlı kitabının təqdimatı keçirilib. Təqdimata müxtəlif təhsil müəssisələrinin tələbələri qatılıb.

Əvvəlcə Ulu Öndər Heydər Əliyevin və ərazi bütövlüyümüzün müdafiəsi zamanı canını fəda edən şəhidlərimizin xatirəsi bir dəqiqəlik sükutla anılıb, Azərbaycan Respublikasının Dövlət Himni ifa edilib.

Sonra R.Abbasov təqdimatın daxili işlər orqanlarında xidmət etməklə yanaşı yazıb-yaradan polis əməkdaşları ilə fəal gənclərin görüşünün təşkili, belə asayiş keşikçilərinin ölkənin mədəni həyatına verdikləri töhfənin ictimaiyyətə çatdırılması çərçivəsində keçirildiyini bildirib. O, dövri mətbuatda vətənpərvərlik ruhlu məqalələrlə çıxış edən polis polkovnik-leytenantı Hafiz Təmirovun həm də Azərbaycan Yazıçılar Birliyinin üzvü kimi öz yaradıcılığı ilə örnək olduğunu vurğulayıb.

Müəllifin “Sevgi dolu ürəyim”, “Gözləmə nə vaxtsa qayıtmağımı”, “Atillaya məktub”, “Dərdimdən ölən dərdlərim”, “İşıq”, “Sevgi də bir Vətəndir”, “Xatirən var” kitablarının geniş oxucu kütləsinin sevgisini qazandığı diqqətə çatdırılıb. Yeni təqdim olunan “Arzu ömrü uzatmır” adlı şeir və hekayələr, publisistik yazılar yer alan nəşrinin də oxucu rəğbəti ilə qarşılanacağına əminlik ifadə olunub.

H.Təmirov gənclərin vətənpərvərlik ruhunda yetişməsi üçün Azərbaycan polisinin genişmiqyaslı maarifləndirici tədbirlər keçirməsindən, narkomaniya ilə əzmkar mübarizəsindən danışıb. Vətən müharibəsinin ön cəbhəsində Daxili Qoşunların hərbi qulluqçularının, arxa cəbhədə isə polisin imza atdığı böyük fədakarlıqlardan nümunələr çəkib. Vətən sevgisinin şeiriyyətlə, sözlə, yaradıcılıqla cilalandığını deyən müəllif yeni kitabında da oxucularına, xüsusən gənclərə bu hissləri bədii boyalarla aşılamağa çalışdığını deyib.

Təqdimat kitab imzalanma mərasimi ilə başa çatıb.