Ümummilli Lideri Heydər Əliyevin 100 illik yubileyinə həsr olunmuş cüdo üzrə açıq turnir keçirilib
Abşeron Olimpiya İdman Kompleksində 516 idmançının iştirakı ilə Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş cüdo idman növü üzrə açıq turnir keçirilib. Turnir BOS Şelf MMC, Azərbaycan Cüdo Federasiyası, Dövlət Dəniz və Liman Agentliyi və Bakı Şəhər Gənclər və İdman Baş İdarəsinin dəstəyi ilə baş tutub.
Yarışdan öncə tədbirin təşkilatçıları və gənc idmançıların iştirakı ilə Ulu öndərin adını daşıyan Bakı Dərin Özüllər Zavodunun ərazisində yerləşən Heydər Əliyevin abidəsinin önünə gül dəstələri qoyulub. Turnir başlamadan öncə Azərbaycan Respublikasının Dövlət Himni səsləndirilib və Vətənimizin bütövlüyü və azadlığı uğrunda canlarını fəda etmiş şəhidlərimizin ruhu bir dəqiqəlik sükutla yad edilib.
Tədbirin açılış mərasimində çıxış edən BOS Şelf MMC-nin Baş Direktor vəzifəsini icra edən Nazim Hüseynov Ulu öndər Heydər Əliyevin hər zaman idmanın inkişafına verdiyi yüksən önəmdən bəhs edib. Ümummilli Liderimizin idman sahəsinə olan diqqəti və qayğısının Azərbaycan Respublikasının Prezidenti cənab İlham Əliyev tərəfindən davam etdirilməsinin bu gün ölkəmizin beynəlxalq yarışlarda əldə etdiyi nailiyyətlərin, habelə mötəbər tədbirlərə ev sahibliyi etməsinin başlıca səbəbi olduğunu qeyd edib.
Tədbirdə çıxış edən Milli Məclisin deputatı, Birinci Qarabağ müharibəsi veteranı Arzu Nağıyev idman sahəsinin vacibliyindən danışaraq, bu günün gənc idmançıların sabahın vətən qoruyucuları olduğunu qeyd edərək bu sahənin ölkəmizdəki inkişafında Ulu öndər Heydər Əliyev və cənab Prezident İlham Əliyevin müstəsna rollarını vurğulayıb.
Tədbirdə çıxış edən Millət vəkili Aydın Hüseynov idman sahəsinin Ümummilli Lider Heydər Əliyevin zəngin irsinin vacib bir hissəsi olduğunu qeyd edərək, Prezident İlham Əliyevin qayğısı altında idmanın Azərbaycan gənclərinin inkişafı yolunda vacib amillərdən biri olduğunu vurğulayıb.
Bakı Şəhər Gənclər və İdman Baş İdarəsinin rəisi Raqif Abbasov çıxış edərək Ulu öndər Heydər Əliyevin və ölkə başçısının idman sahəsinə göstərdikləri qayğı və dəstəyin, Azərbaycan gəncləri və peşəkar idmançıları tərəfindən daima hiss olunduğunu qeyd edib. Bu kimi turnirlərin idmançıların karyerasına müsbət təsir göstərdiyini və gəncləri böyük idmana doğru aparan bir qapı olduğunu qeyd edən Raqif Abbasov, idmançılara nailiyyətlər və Azərbaycan bayrağını daima zirvələrə yüksəltmələrini arzulayıb.
Müxtəlif çəki dərəcələrində uğurlu nəticə göstərən 84 idmançıya medal, diplom və BOS Şelf MMC tərəfindən hədiyyələr təqdim olunub.
