“5 mart-Bədən Tərbiyəsi və İdman Gunu” nə həsr olunmuş tədbir keçirilmişdir.
Yasamal rayon İcra Hakimiyyətinin konfrans zalında “5 mart-Bədən Tərbiyəsi və İdman Gunu” nə həsr olunmuş tədbir keçirilmişdir. Tədbirdə Milli Olimpiya Komitəsinin vitse-prezidenti, Ədalətli Oyunlar Komissiyasının sədri Xəzər İsayev, Bakı şəhər Gənclər və İdman İdarəsinin rəisi Raqif Abbasov, millət vəkilləri Ülvi Quliyev və Elşad Həsənov, Yasamal rayon İcra Hakimiyyəti başçısının müavini Təravət Muradova, Yasamal rayon Gənclər və İdman İdarəsinin rəisi İlham Səfərov, tanınmış idmançılar və rəsmi qonaqlar iştirak etmişdir.
Tədbiri giriş sözü ilə Yasamal rayon Gənclər və İdman İdarəsinin rəisi İlham Səfərov açaraq toplantı iştirakçılarını salamlamışdır. Daha sonra İlham Səfərov «Müstəqil Azərbaycanın idman tarixi» mövzusunda çıxış etmiş və bildirmişdi ki, Azərbaycan Respublikasının Prezidenti İlham Əliyev cənablarının 04 mart 2005-ci il tarixli sərəncamı ilə 5 mart tarixi «Bədən tərbiyəsi və idman günü» elan edilmiş, habelə «Əməkdar bədən tərbiyəsi və idman xadimi» adı təsis edilmişdir. İlham Səfərov qeyd etmişdir ki, imzalanmış sərəncamlar ölkə rəhbərliyinin idmana və ölkə idmançılarına olan tükənməz qayğısının bariz nümunəsidir.
Sonra Baş İdarənin rəisi Raqif Abbasov çıxış edərək bədən tərbiyəsi və idman günü münasibətilə tədbir iştirakçılarını təbrik etmişdir. O öz çıxışında qeyd etmişdir ki: “ Azərbaycanda idmana dövlət tərəfindən göstərilən diqqət və qaygı nəticəsində idmançı olmaq çox şərəfli bir peşəyə çevrilmişdir. Son illər idman bölmələrinə müşahidə edilən axın bir daha göstərir ki, gənclərimiz, uşaqlarımız idmanla məşğul olmaq istəyirlər. Azərbaycanda idmanın inkişafı üçün çox gözəl şərait yaradılmışdır. Bu inkişaf həm gənclərimizi sağlam, möhkəm iradəli, həm də vətənpərvər kimi yetişdirmək məqsədini daşıyır.”
Toplantıda bir qrup idmançı 5 mart-Bədən Tərbiyəsi və İdman Günü münasibətilə idmanda əldə etdiyi yüksək nailiyyətlərə görə, habelə bir qrup idman ictimaiyyəti nümayəndəsi yeniyetmə və gənclər arasında idmanın təbliğində göstərdiyi səmərəli fəaliyyətinə görə Yasamal rayon Gənclər və İdman İdarəsinin təsis etdiyi fəxri fərman və xatirə hədiyyələri ilə mükafatlandırılmışlar. Bundan əlavə, tədbirdə Yasamal rayon məktəbliləri arasında keçirilmiş XXVIII spartakiadanın və “Şahin” hərbi-idman oyunu üzrə rayon birinciliklərinin qalibləri müvafiq kubok və diplomlarla təltif edilmişdir.
Həmçinin 5 mart-Bədən Tərbiyəsi və İdman Günü münasibətilə 1-5 mart tarixləri paytaxtda idman həftəsi elan olunmuş və bu tarixdə keçirilən bütün tədbirlər idman gününə həsr olunmuşdir. Belə ki, şaolin, şahmat, futbol, stolüstü tennis, karate-do, idman rəqsləri və s idman növləri üzrə keçirilən yarışları misal göstərmək olar.
